جرمني او هسپانيه افغانستان ته نور عسکر او درنې وسلې ليږي

د آلمان پوځ غواړي،د طالبانو سره د سختو نښتو په نظر کې نيولو سره، د خپلو درندو وسلو د  کارولو په هکله نوې لاره غوره کړي. آلمانۍ ورځپاڼه Handelsblatt نن پنجشنبه ليکي، چې  د آلمان په پارلمان کې د دفاعي چارو د جرگه گۍ د تفتيش رئيس يوې غونډې ته وويل، دنورو په ډله کې به د مارډر Marder په نامه شوبلو څخه هم کار اخيستل کيږي.
همدا شان به د دوي سرتیرو ته د ايگل Igel په نامه زره پوش او هم د Dingo او Fuchs په نامه ټرانسپورټي وسيلې ورکول کيږي.
جرمنۍسوسيال دموکراتانو د افغانستان شمال کې د آلماني ځواکونو په چوکاټ کې د جنګي څرخي الوتکو د ګمارنې غوښتنه هم کړېده.
همدارنګه  د هسپانيې د دفاع وزارت اعلان کړی دی چي په افغانستان کي د ټاکنو د خوندي تر سره کيدو د پاره (۵۳۲) تنه نور سرتيري افغانستان ته وليږي. په پام کي ده چي دغه عسکر به د ټاکنو او د هوايي ډګرونو په ساتلو کي په دندو وګومارل سي او تر ټاکنو يوه مياشت وروسته به بيرته خپل هيواد ته راستانه سي.

ښاعلی حامد کرزي د محقق د ژمنو خبرې رد نه کړې

دکابل څخه په یوخبرکې ،ولسمشر حامد کرزي  د هغه وخت راپه دی خوا چې د ولسي جرگې غړي او د وحدت گوند مشر محمد محقق ورسره د ملاتړ په بدل کې  د ژمنو پرده پورته کړه په لومړي ځل غبرگون ښکاره کړ .

 ښاغلي کرزي د محمد محقق د غوښتنو په باب د يوې پوښتنې په ځواب کې دا ونه ويل چې دا خبرې ناسمې يا سمې دي .

ولسمشر يوازې دومره وويل چې دى د ده په وينا په مشارکت باور لري .

ښاغلي کرزي زياته کړه :

افغانستان د ټولو افغانانو ګډ کور دى او زه په دې وياړم، چې د خپلې واکمنۍ پر مهال مې دغه اصل په پام کې نيولى او که خلک بياهم رايه راکړي او ولسمشر شم،  نو يو داسې حکومت به  رامنځ ته کړم، چې د ټولو افغانانو ونډه په کښې  وي .

ولسمشر کرزي د خپل نوي مرستيال قسيم فهيم په باب  وويل چې مجاهدين  د واکه گوښه سوي وو او د دې دپاره چې د ده په وينا  دغه ستونزه حل سوې وي ښاغلى فهيم يې خپل مرستيال نومولى دى .

 په کابل کې د سياسي چارو شننونکو د ښاغلي کرزي پر دغه سپيناوي حيرانتيا ښودلې ده .دوى وايي  د طالبانو د نسکوريدو را په دی خوا په پرله پسې توګه مجاهدين واکمن دي او د دوي د گوښه کيدو خبره د منلو وړ نه ده .

د محمد محقق سره د ژمنو د نه ردولو په باب سياسي شننونکوهم  ويلي چې دا کار به د افغانستان په سياسي چاروکې بده پيلامه وي چې عواقب  به يې شايد ښه نه وي.

هغه تور لوګي چې هره ورځ له کابل سرينا له هوټل څخه په ښار کې خپريږي دکابل ښاريانو روغتيا ته زيان رسوي

باختر:ځينې کابل ښاريان وايي هغه تور لوګي  چې  هره ورځ له کابل  سرينا له هوټل څخه  په ښار کې  خپريږي دکابل ښاريانو  روغتيا ته زيان رسوي .  داپه داسې  حال کې  دى چې دولت د چاپيريال ساتنې دککړتيا ستونزې دڅيړنې په خاطر دافغانستان داسلامي  جمهوريت د جمهور رئيس حامدکرزي  په مشرۍ  يو کميسيون  جوړ کړى دى چې په کابل او دهيواد په نورو ښارونو کې  دهوا دککړتيا  له امله رامنځته شوي  ستونزې لرې کړي . د فروشګاه دساحې دوکانداران  وايي له زياتې مودي راپديخوا د سالنډي  په ناروغۍ اخته دي او هغه لوګي چې له کابل سرينا  هوټل څخه  خپريږي  ددوى د ځورونې  سبب کيږي  دفروشګاه دساحې دوکاندار  فريد په دې باب  وويل چې دکابل سرينا هوټل لوګي  هره ورځ دى ځوروي او دشپې له پلوه  د سالنډي  ناروغۍ ورته پيدا شوې ده . دى وايي  ناچاره دى چې هره ورځ  لوګي تنفس کړي . دکابل سرينا  هوټل متصدي حميد قادري  تائيدوي  چې ددغه هوټل  د پخلنځي  لوګي  دکابل ښار په مرکز کې دهوا دککړتيا  دزياتيدو  سبب شوى دى .  حميد قادري وايي دچنکاښ دمياشتي تر پاى پورې د پخلنځي  دبرخې وسايل دبريښنا په سيستم عياروي .  د چاپيريال ساتنې  مسوولين هم له دې  پلوه انديښنه لري ،  دچاپيريال ساتنې دملي اداري د پاليسي ، تحقيق  او معلوماتو رئيس سيد محمد رحيمي وويل :  چې ددغه هوټل دلوګي په باب زيات شکايتونه دغې ادارې ته رسيدلي دي .  ده وويل موږ خپلې انديښنې دهوتل متصديانو ته رسولي دي  رحيمي څرګنده کړه چې د چاپيريال ساتنې ملي اداره له دوه کاله مخکې  څخه دهغو عواملو په باب چې د چاپيريال ساتنې دککړتيا سبب کيږي کار پيل کړي  دي او يوه  مقرره يې طرحه کړې ده  او په نږدې راتلونکي کې به تصويب شي .  ده وويل: په دې مقرره کې  دهغو مراجعو لپاره چې دچاپيريال  دککړتيا سبب کيږي   د نورو اقداماتو ترڅنګ  نغدي  جريمه هم لګول  شوې ده .  درحيمي  د څرګندونو له مخې  اړونده اداري هيات دکابل سرينا هوټل دپخلنځي  دلوګي  د ستونزې د څيړلو په حال کې دي  او دغه موضوع په جدي  ډول تعقيبيږي .  درابعه بلخي  روغتون دروازې  ترشاه دناروغ يو پايواز چې  دسرينا هوټل ته څيرمه پروت دى  او يوازې يو سړک  هغوى سره جلا کوي  داسې ناولي او ناپاکې  او به يې وليدلي  چې  دهوټل له لارې څخه فروشګاه  ته څيرمه دعمومي واټ تر څنګ  پرويالو کې  بهيږي  او په چاپيريال کې ناوړه بوي ترې  خپريږي  پروفيسر ډاکتر نجيب الله امر اخيل وويل دهغو تيلو له امله راپيدا  شوي  لوګي چې دکيفيت له کنترولو پرته وارديږي  دخلکو په روغتيا کې زياتې انديښنې  راپيدا  کوي  او هغه کسان چې هره ورځ د ډيزلو تيلو دسوځيدو  له لوګي  سره مخامخ دي  له شک پرته  دسالنډي ، هاضمي او  سترګو په ناروغيو او په جلدي  ناروغيو اخته کيږي دغه راز دکابل ښاروالۍ چارواکې  په دې برخه کې دهلوځلو  خبر ورکوي .  دکابل ښاروالۍ دښاري خدمتونو مرستيال  وهاب الدين سادات  وايي  څو ځلې دکابل سرينا هوټل له چارواکو سره ددغې ستونزې  په اړوند تماس نيول شوي ، خو په زړه پورې نتيجه نه ده ترلاسه شوي .  دکابل ښاروالۍ دښاري خدمتونو مرستيال زياته کړه کابل ښاروالۍ هم مقرره لري  چې دهغې  له مخې هغه مراجع او کسان چې دښار دپاکوالې دخرابوالې  سبب کيږي  دتنظيف د جريمې ورکولو ته  اړکيږي  په هر صورت ستونزه  دښار په زړه کې د جمهوري رياست دارګ  په څو متري کې موجوده ده ، چارواکي وايي  دغه ستونزه لرې کيږي   خو خلک وايي تر څو چې  اپين له بغداد څخه رارسيږي  مارچيچلي  مري .

ليبرمن د هستوګنځيو په برخه کې د امريکې سره مخالفت ښکاره کړی

داسرائيلو د بهرنيو چارو وزير اويګدور ليبرمن د خپلې امريکايۍ سيالې ميرمن هلري کلنټن سره په يوې کتنه کې، يو ځل بيا په لويديز اردن کې د يهودي هستوګنځيو د جوړولو په هکله د امريکا غوښتنې یې رد کړېدي. نوموړي په واشنګټن کې وويل، د اسرائيلو د نفوذ د زياتېدنې په نظر کې نيولو سره، دا ډول غوښتنې هغه هېواد ته د منلو وړ نه دي.
ميرمن کلنټن بيا د هستوګنځيو د جوړونې پر بندولو ټينګار کړی دئ او زياته کړې يې ده، د امريکا د لړلیده، په منځني ختيځ کې د سولی دراوستنې لومړی شرط همدا دئ. کلنټن د اسرائيلو دا خبره هم ردکړېده، چې وايي د امريکې مخکيني مشر جارج بوش ورته د هستوګنځيو دجوړولو اجازه ورکړې وه.
داهسی ویل کیږی چې  به په راتلونکي اونۍ کې د اسرائيلو لومړی وزير بنيامين نتانياهو او د امريکا ځانګړی استازی جورج ميشل به  په پاريس کې پر دې موضوع باند ی سره و ږغيږي .

د امریکا کانګرس د( ١٠٦ )مليارډو ډالرو اضافي پوځۍ بودجه ومنله

ددې پوځۍ بودجې  اوډالرو څخه به د افغانستان او عراق د جګړو لګښت، د سورکوزی  د والګي سره د مبارزې او مخنيوي خرڅه او هم نړيوال پولي صندوق ته د امريکې د غړيتوب ونډه ورکول کيږي.
بودجه د (٢٠٢ )مخالفو رايو په مقابل کې د( ٢٢٦ )موافقو رايو  د مخې ومنل سوه. وکيلانو د دې پانګې داهسې يوه بڼه تصويب کړې ده چې د دوي او د سنا يا مشرانو د جرګې د توپير ترګډ انډول سره برابر کړي او د منلو وړ وي.
دا اندازه پيسې به د سپتمبر د مياشتې تر ٣٠ نېټې پورې د سږنۍ پانګې په جمع شمېرل کيږي.
د دې پيسو نه د نورو لګښتونو تر څنګ، ٧٩،٩ مليارده ډالره د عراق او افغانستان جګړو ته او(٧.٧ ـمليارده ډالره د سورکزی د والګي دوېروس H1N1 سره مبارزې ته ورکول کيږي. په دې پيسو کې( ٨ )مليارده ډالره نړيوال پولي صندوق ته هم په نظر کې نيول شويدي. بر سېره پر دې (٨ )مليارډوباندی  به (١٠٠ )مليارډه نورهم نړيوال پولي صندوق ته، د پرمختلونکو هېوادونو سره د نړيوال بحران په وړاندې مبارزه کې د مرستو کولو په خاطر ورکول کيږي.
د امريکا د استازو په جرګه کې پر دې موضوع باندې د بحث کولو په موقع اصلي غړي دموکرات ډاويډ اوبې David Obey نړيوال پولي صندوق ته د جمهوريت غوښتونکو  د مخالفت او مقاومت څخه په موافقه ښودلو سره وويل، چې دا تدبير د نړيوال مالي بحران د مخنيوي د پاره اړین  وو. نوموړي استازي وړاندې په ډاګه کړه: تاسې پوهېږی، چې دا يو حقيقت دئ. موږ بايد د نړيوالو سره برخه واخلو، او کله چې نړيوال اقتصاد څپڅپانده کيږي، موږ خپلو ځانونو ته دا مسؤوليت لرو، چې د نړيوال اقتصاد حالت بېرته راسم کړو.
جمهوريت غوښتونکو نړيوال پولې صندوق ته د پيسو له ورکولو سره مخالفت کاوه، او ويل يې چې د دې څخه هغه هېوادونه هم ګټه اوچتوي، کوم چې د امريکا  د متحده ايالتونو سره مخالف دي. مګر د ډېرترو استازو مشر ستيني هوير Seny Hoyer پولي صندوق ته پانګه ورکول د نړيوال اقتصاد د پاره يوه بيمه وبلله او په ډاګه يې کړه: که هر څه سم پر مخ ولاړ شي، نو دا پيسې به د امريکې له متحده ايالتونو څخه ونه وزي. خو که حالات سم پرمخ ولاړ نه شي، او نړيوال اقتصاد يو بل شوک هم وويني، نو بيا به دا پيسې مرسته کوي، چې نړيوال پولي صندوق له لوی خطر او اقتصادي نړښت سره مخامخو هېوادونو ته کمک ورکړي.
هوير Hoyer د سورکوزی د والګي سره د مبارزې په خاطر پيسې ورکونه په دې ټکو سره وستايله: دا په داسې حال کې چې د ملګرو ملتونو د روغتيايي چارو څارګری ډله وویل : د سورکوزی والګی، وروسته د( ٤١) کالونو د لومړي ځل د پاره د يوې نړيوالې منځ ته راغلې ناروغتيا په توګه اعلان کړه.
نوموړي استازي له رايو ورکولو څخه لږ څخه مخکې په ډاګه وويل: هر هغه څوک که نن د دې والګي د مخنيوي د لګښت پر ضد رايه ورکوي، هيله لرم ميدان ته راووزي او زموږ ل د خلکو دروغتیا اوسلامتیا  سره د خپلې لوبې پرڅرنګوالي رڼا واچوي .

دچهارشنبی   ورځ   د۱۳۸۸لمريز کال د(غبرګولی)اوه ویشتمه (۲۷) مه

 اود -۲۰۰۹- زیږدیز کال  دمي دمياشتی اوه لسمه -۱۷مه- نيټه

د جمهوری رياست د كانديدانو كمپاين پیل شو